Ang mga sakop sa Gingharian sa Ginoo

Nobyembre 26. Ang mga sakop sa Gingharian sa Ginoo: Jn 18:33-37
Si Jesus mao ang Hari, giingon ni Pilato. Usa ka pagano ang niangkon nga si Jesus hari gayud tungod kay wala usba ni Pilato ang gisulat sa krus nga mao “Jesus nga Taga Nazaret, Hari sa mga Judio.”
Hari diay si Jesus! Sumala sa mga tawo, unsay nahitabo sa gingharian sa Ginoo tungod kay gilansang siya sa krus ug wala niya buhii ang katawhan sa Israel sa gahom sa mga Romanhon? Kini ang gilauman sa mga Judio, apan wala maglaban si Jesus ug ang iyang mga tinun-an pinaagi sa mga armas sa mga tawo.
Nagbutyag si Jesus sa atong Ebanghelyo karon kun unsaon gayud ang pagkahari niya. “Natawo ug mianhi ako sa kalibutan alang sa usa lamang ka tuyo nga mao ang pagsaksi sa kamatuoran.” Unsay buot ipasabot niini?
Nga ang ginharian sa Ginoo, Gingharian sa kamatuoran ug sa gisulti ni Jesus, diha sa kamatuoran anaa ang kaluwasan: “Kon tumanon ninyo ang akong pagtulon-an, tinuod gayod nga kamo akong mga tinun-an; mahibalo kamo sa kamatuoran ug ang kamatuoran maghatag kaninyog kagawasan.” (Jn 8:31-32)
Para mahimo kitang sakop sa usa ka nasod o lumulupyo sa usa ka siyudad, basta gipakatawo kita didto. Unsay gibuhat nato aron mahimo kita nga mga Pilipinhon? Wala. Apan diha sa Gingharian sa Ginoo, dili lamang tungod kay binunyagan kita o natawo sa usa ka katolikong banay nga mahimo kitang mga sakop sa Ginagharian sa Ginoo o mga tinun-an niya. Maayo man kun motando kita sa gisulti ni Jesus ug magpadayag sa atong pagtuo diha sa misa matag domingo, pero dili pa igo.
Ang pagtuman sa iyang pagtulon-an mao ang saktong paagi nga gibuhat sa mga tawo nga gustong mosunod kang Jesus ug makatagamtang sa kamatuoran.
Ang mga sakop sa gingharian sa Ginoo mopili sa kamatuoran, mopili sa kahayag sa kanunay.
Sa laing bahin, gipili sa mga kadagkoan sa mga Judio nga patyon si Jesus, gipili nila sa ilang kaugalingon interes, sa kangitngit ug sa bakak.
ANG ATONG MISYON KARON
Walay kagawasan ug wala gayuy kaluwasan alang kanato kun ang atong pagtuo ngadto sa Ginoo anaa diha sa atong mga pulong lamang.
Bisan mga makasasala, ang mga sakop sa Gingharian sa Ginoo modawat sa ilang kaugalingong kahimtang ug gusto nila mosunod kang Jesus. Dili hingpit ang mga sakop sa Gingharian sa Ginoo –tawo gihapon- apan manlakaw sila sa dalan sa kaluwasan sama ni Saqueo, sama sa babaye nga hisakpan nga nanapaw, nga nagdawat sa ilang pagkamakasasala ug giluwas hinoon sila ni Jesus.
Si Jesus ang nagsaksi sa kamatuoran ug gitanyag niya kini kanato aron mahimo kitang tanan nga mga saksi niining kamatuoran. Atong masaksihan kining kamatuoran atubangan sa mga tawo, dili ang kamatuoran nga anaa sa mga libro apan ang kamatuoran nga anaa sa Pulong sa Ginoo nga maoy maghatag kanatog kagawasan.
Naghari ba ang Ginoo diha sa atong kaugalingong kinabuhi, diha sa atong katilingban, diha sa simbahan sa kanunay? O ato ba lamang pilion ang atong kaugalingon mga pag-“hari-hari” (ang kalibutanong mentalidad, ang atong kaugalingon mga pulong, ang mga bakak…) para mas “komportable” ang atong kinabuhi?
Atong itandi ang atong mga pulong, ang atong gihunahuna ug ang atong gibuhat ngadto sa kamatuoran sa Ginoo kini mao ang mahimo untang modelo alang kanato. Atong isalikway ang tentasyon nga ang pagtulon-an sa kalibutan ang mahimong panig-ingnan alang kanato diha sa atong pagkakristianos. Makadawat unta hinoon kita sa atong “citizenship” isip sakop sa Gingharian sa Ginoo! “Hinuon, may midawat ug mituo kaniya; busa sila gihatagan niya sa katungod nga mahimong anak sa Dios.” (Jn 1-12)