Andama ang dalan alang sa Ginoo

Disyembre 10. Andama ang dalan alang sa Ginoo (Lk 3:1-6)
Duol na ang Pasko! Sama sa nahitabo sa panahon ni Juan nga Magbubunyag nga gipaandam niya ang mga tawo sa pagdawat kang Jesus, mahitabo unta kanato niining panahon sa adbiyento nga mangandam kita alang sa pagsaulog sa Pasko.
Importante ang mga gawasnong mga butang sama sa Christmas lights, mga regalo… apan diha sa atong kristohanong kinabuhi, unsa bay importante nga atong andamon alang sa pista sa pagkatawo ni Jesus? Dili lamang ang mga gawasnong mga butang apan ang atong kinaiya ang gikinahanglan bag-ohon.
Pinaagi sa mga sambingay gisulti ni Juan sa mga tawo kun unsay maayong kinaiya para sa mga tawo aron makadawat sila sa kaluwasan nga gikan sa Ginoo, mga pulong nga kusog kaayo alang sa mga tawo.
Sa dili pa magsugod sa mga husto nga gimbuhaton, gihisgutan ni Juan sa mga “basic attitudes” para sa mga tawo: “Hinulsoli ug biyai ang inyong mga sala ug pabunyag kamo.” Sa tinuod gayud, kun maayo ang atong kinaiya, magsugod kita sa usa ka pagbag-o diha sa atong kaugalingon kinabuhi. Unsay buot ipasabot niini alang kanato?
ANG ATONG MISYON KARON:Atong gamiton ang sambingay nga gisulat ni Isaias sa iyang basahon ug sulayan nato sa pagdiskobre sa relasyon sa gisulti ni Juan alang kanato:
Usa, ang pagdawat sa atong kaugalingon kahimtang. Sigurado nga wala pa kita moabot sa kahingpitan… busa makasasala kita. Walay pagbag-o sa usa ka masakiton kun dili modawat sa iyang balatian; walay pag-usab sa kinabuhi kun dili kita makabaton sa atong pagkulang sa kahingpitan.

“Andama ninyo ang dalan alang sa Ginoo. HAWANI ninyo ang iyang agian”: Giampo nato sa Amahan Namo nga “Umabot kanamo ang imong gingharian…” ug tinuod gayud nga niabot na… apan walay mahitabo sa kalibutan ug sa atong kinabuhi kun dili nato ablihan ang atong kasingkasing sa Pulong sa Ginoo. Sa laing pagkasulti, ang atong kaugalingon mga desisyon ang mahimong condition sa pagpuyo sa Ginoo diha sa atong tagsatagsa ka kinabuhi. Dili mopugos ang Ginoo kanato sa pagdawat sa iyang kaluwasan.

“ABUNOHI ninyo ang tanang libaong” Unsa bay kulang aron mangandam kita sa dalan sa Ginoo? Usahay kulang sa pagkamapaubsanon o sa pagtuon mahitungod sa Pulong sa Ginoo; o kulang ba sa paghigugma ngadto sa atong mga igsoon nga nagkinahanglan…?

“PATAGA ang tanang bungtod ug bukid” Unsa bay sobra nga mahimong babag sa pagpalambo sa mga kristiano? “Pataga” ang imong pagpasigarbo, putlon unta ang kasina, ang pagbatikos, ang panaglalis ug ang pagkahambugero…

“TUL-IRA ang mga nagliko-likong dalan” Naa bay mga “yields” diha sa atong kinaiya? Usahay ang mga likoliko mao ang pagpaayo sa mga problema pinaagi sa “lagay”, ang atong mga pagkabakakon (“white lies siguro” aron mopakyas kita sa mga dagkong problema kono), ang mga relasyon nga “ambiguous”…

“HAPSAYA ang mga gansalgansalong dalan” Unsa bay lubaklubak sa atong kinabuhi? Diha sa atong kinaiya naa bay mga butang nga nagdaot kanato? Mga dili maayong nga pagbati ug mga pangandoy sa pagpanimalos batok sa mga tawo ba…?
Makakita kita sa KALUWASAN SA GINOO kun “deretso” na ang atong agianan alang kaniya kun makaagi ang Ginoo sa dalan paingon sa atong kaugalingong kinabuhi.

“Ang akong pag-ampo alang kaninyo mao nga magtubo unta ang inyong gugma, kahibalo ug kaalam sa paghukom, aron makapili kamo sa labing maayo.” Kini ang gisulti ni Pablo ngadto sa Taga-Filipos ug kini sab unta ang atong hustong kinaiya sa pagpangandam sa Pasko.