Nobyembre 19. Ang pag-usisa sa mga timailhan sa panahon

Nobyembre 19: (Mk 13:24-32). Ang pag-usisa sa mga timailhan sa panahon - Reading the signs of times
Sa Ebanghelyo karon gipadayag ni Jesus sa iyang mga tinun-an kung unsay mahitabo sa iyang pagbalik. Sa nagkalain-laing mga butang nga giasoy ni Jesus mahitungod niini, walay si bisan kinsa nga na nasayod kun kanus-a kini moabot gawas sa Amahan lamang.
Apan adunay duha ka butang nga nahibilin para kanato: ang pag-usisa sa mga timailhan sa atong panahon ug ang pagkamabinantayon sa kanunay. Sumpay niining Ebanghelyo karon, kini ang gisulti ni Jesus sa iyang mga tinun-an: “Pagbantay ug pagtukaw kamo, kay wala kamo masayod kanus-a kini moabot.”
Mahitungod sa atong pagbasa sa mga timailhan sa kinaiyahan: Nga kon modag-um ang langit… atong andamon ang payong… Diha sa Ebanghelyo ni Lucas, gihagit ni Jesus ang mga tawo sa pagsulti niya nga, “Mga tigpakaaron-ingnon! Makamao kamong mosabot sa kahulogan sa dagway sa yuta ug sa langit, apan ngano dili man kamo makasabot sa kahulogan niining panahona?” (Lc 12:56). Importante para nato ang pagsabot sa mga timaan sa pagbalik sa Anak sa Tawo.
Sama sa pagtulon-an sa kahoyng igera… ang buot ipasabot niini, nga magbantay kita sa kanunay sa mga panghitabo dinhi sa atong palibot, sa kalibutan; nga tan-awon unta nato ang mga “signs of the times” diha sa atong tagsa-tagsa ka kinabuhi, diha sa katilingban, diha sa Simbahan aron masabtan nato kun unsay angay buhaton ug aron masyran nato kun kanus-a mobalik ang Anak sa Tawo.
ANG ATONG MISYON KARON:
Maayo kaayo kun kita mga “Anak sa Dios” ug magtutuo kang Jesus mahimong hanas ug bansay sa pagsabot sa mga bag-ong kahimtang sa atong pahanon. Pananglitan, ang mga nanindahay, makamao kaayo sila sa pagbasa sa panghitabo sa katilingban: andam sila sa Christmas time ug ilang ibaligya ang hustong mga paninda…
Usa ra ang Ebanghelyo ug lig-on ang Pulong sa Ginoo, mas lig-on pa kay sa langit ug sa yuta. Apan, lain-laing ang mga kahimtang nga nasinati sa mga tinun-an ni Jesus sa kasaysayan. Makahuluganon nato kini sa atong kahimtang tungod sa daghang mga “means of communicaton”, nagkalain-laing matang na kabahinan diha sa atong mga panimalay nga nag-usab sa mentalidad mahitungod sa moralidad, sa politika, sa kultura ug sa relihiyon.
Sa atong tagsatagsa ka bahin – Unsa ang gisulti ni Jesus kanato (sa tagsa-tagsa ka kaugalingon)? Unsay kabubut-on sa Ginoo samtang “maghulat”kita? Magbinantayon unta kita ug atong gamiton ang mga butang nga makatabang sa pagsangyaw sa Maayong Balita; nga atong isalikway ang mga kinaiya nga makababag sa pagpaambit mahitungod sa Gingharian sa Ginoo.
Sama sa kahoyng igera nga mamunga sa saktong panahon, mamahimo ang mga tinun-an ni Jesus nga mga tawo’ng nga malambuon sa kinabuhi nga gikan sa Ginoo ug magtukod sa usa ka kalibutan, nga ang kultura subay sa kabubut-on sa Dios karon sa atong panahon.
Angay kanatong mga tinun-an ni Jesus nga magtrabaho kita nga magmakanunayon diha sa tagsa-taga ka kinabuhi samtang maghulat sa pagbalik sa Ginoo. Tinuod gayud hangtod karon nga “ang mga tawo niining kalibotana mas maantigo modumala sa ilang bulohaton kay sa mga tawo nga iya sa kahayag” (Lc 16:8), busa angay kanato nga kitang tanan mahigmata aron makapukaw diha sa atong mga banay, sa atong katilingban, ug sa Simbahan. Ug kita mamahimo nga mga committed nga disipulo ni Jesus.
Dili kita angay nga mahadlok sa pagbalik ni Jesus tungod kay siya ang atong igsoon ug manluluwas. Kun mahimo kitang tanang mga matinud-anon nga tinun-an, maglipay kita sa iyang pagbalik, kinahanglan nga magmalipayon kita sa iyang pagbalik.