Duol na ang inyong kaluwasan

Disyembre 3. Duol na ang inyong kaluwasan. Lk 21:21-25, 34-36
Makahadlok ba kanato ang gisulti ni Jesus sa Ebanghelyo karon? Bisan Unang Domingo sa Adbiyento, mora’g maglisod ang mga tawo sa panghitabo sa adlaw, sa bulan ug sa kabituonan. Ngano man nga gipili sa Simbahan kining Ebanghelyo sa Panahon sa Adbiyento nga maoy panahon sa paglaum, panahon sa paghulat sa pagabot sa Ginoo ug sa pagpangandam sa dakong Fiesta sa pagkatawo ni Jesus?
Sa gisulti ni Jesus sa Ebanghelyo, ang atong misyon sa atong panahon, taliwala sa iyang pagsaka sa langit ug sa iyang pagbalik (ang atong kinabuhi!) anaa diha sa duha ka pulong:
PAGBANTAY KAMO! Kini ang gisulti ni Jesus sa iyang mga tinun-an..
Ikaduha, ANG PAGLAOM UG ANG PAG-AMPO SA KANUNAY aron makabaton kita sa kalig-on atubangan sa mga panghitabo ug aron makabarog kita atubangan sa Anak sa Tawo.
Bisan nga hangtud karon tua pa didto sa saktong agianan ang mga planeta… anaa nay mga ilhanan sa langit ug sa yuta nga mahimo untang timailhan alang kanato. Naay mga kahimtang nga dili klaro o nga dili maayo sa katilingban, adunay mga kalisdanan sa atong kaugalingong kinabuhi, lisod gayud ang kahimtang sa nasod karon… Timailhan ba kining mga butanga nga duol na ang katapusan? Dili! Sa mga tawo nga nagatuo kang Jesus ang mga panghitabo (mga nindot nga butang ug mga dili nindot), dili timailhan nga matapos na ang tanan, apan senyas nga manglakaw unta kita padulong sa usa ka bag-ong kahimtang. Sa laing pagkasulti ang kangitngit sa gabii maghatag ug paglaum sa pagsubang sa adlaw, ang sakit sa usa ka tawo mahimo untang paglaum nga maayo siya, ang mga problema dili maoy babag nga makahunong kanato apan mahimong hagdanan sa usa ka mas nindot nga kahimtang.
Busa, sakto gayud ang mga basahon karong Dominggoha ug angay gayud kaayo sa panahon sa Adbiyento. Gipili sa Simbahan kining Ebanghelyo aron dili kita mahadlok, hinoon aron paglig-on unta sa atong paglaum. Samtang naghulat kita sa pagbalik ni Jesus, maayo unta kun ang mga magtutuo kang Jesus mahimong mga tawo nga makatagna sa kaluwasan, ug makapaambit sa mga kaigsoonan mahitungod sa mga pulong nga puno sa paglaum pinaagi sa gisulti ni Jesus: “Duol na ang inyong kaluwasan!”
Diha sa atong tagsatagsa ka kinabuhi, importante kaayo nga atong buhaton bisan gamay ra sa pagpaanindot sa atong palibot... Sigurado nga wala kitay gahom aron makausab sa tibuok kalibutan o sa Simbahan apan ang akong matinud-anon nga kinaiya mahimong kabahinan alang sa pagtukod sa Gingharian sa Ginoo.
Nagatuo ba kita nga ang mga gagmay natong mga buluhaton mahimong makahuluganon alang sa kalibutan? Sa hilabihan nga kangitngit, bisan usa ka posporo makahatag ug kahayag, dili ba? Sa samang paagi, usa ka nindot nga pulong ug ang mga gagmay nga atong gibuhat ilabi na ngadto sa mga kabus makahatag kanila sa paglaum.
Tabangi kami Ginoo aron dili kami mawad-an sa paglaum atubangan sa mga kalisdanan; tultoli kami sa imong dalan aron makabarog kami sa imong atubangan kun mobalik ka na.
Atong gamiton ang mga pulong sa salmo responsoryo karong Dominggoha ug ingon niini tumanon nato ang gisugo ni Jesus kanato karon, Pagbantay ug pag-ampo!
Agaka ako diha sa imong kamatuoran ug tudlo-i ako, kay ikaw ang akong Dios nga Manunubos
…Ang tanan nga dalan sa Ginoo maayo ug makanunayon alang kanila nga nagabantay sa iyang kasugoan.
Maranatha! Come Lord Jesus!